Bargiidbellodaga sámediggejoavku eahpida ahte šakšabivdu berre biddjot johtui dál, dadjá jođiheaddji Egil Olli.

Šaksa lea dehálaš ekologálaš vuogádahkii ábis ja lea okta daid deháleamus bivddáhasain mii aba lea ge vuonain ja ábis. Dan sivas ii galggašii bivdit šavššaid ovdal go ceavzilis hivvodat lea sihkkarastojuvvon.

Bargiidbellodaga sámediggejoavku guorrasa dutkkiid várrehusaide ahte ii álggat šakšabivddu, ja vuođustussan dasa lea ahte hivvodat ii gierdda dákkáraš bivddu.

Šakša lea dehálaš oassin dorskki biepmus. Lea stuorát servodatlaš vuoitu ahte šakša lea biebmun stuorát guliide go bivdit dan konsuma várás.

Šakšabivdu váikkuha sihke guollenáliid šaddamii ja birgejupmái ja servodagaide ja ássamii vuotna- ja riddoguovlluin. Erenoamážit čuohcá dát sámi beroštumiide mat leat čatnon dasa ahte ekologálaš vuogádat doaibmá.

Bargiidbellodaga sámediggejoavku bivdá norgga eiseválddiid čuovvolit dutkkiid ávžžuhusaid ahte šakšabivdu ii rahppo 2007:s, loahpaha jođiheaddji Bargiidbellodaga sámediggejoavkkus Egil Olli.