CO2 luoitin gássarusttegis Hámmárfeasttas

CO2 luoitin gássarusttegis Hámmárfeasttas

Bargiidbellodaga sámediggejoavku lea fuolastuvvan CO2 gássa boaldima geažil LNG rusttegis Muolkkáin Hámmárfeasttas.

Lagašbirrasii lea CO2, gožu ja NOx luoitimis guhkesáiggi vahátváikkuhus olbmuide, guohttu ealliide ja meara ealániidda.
Dás leat váikkuhusat guovllu álbmoga eallinkvalitehtii, ja lea maiddái áittan buot borramušbuvttadeapmái davviguovlluin.

Luoitimis leat vuosttažettiin váikkuhusat lagašbirrasii, muhto luoitin dagaha maiddái ahte máilmmiviidosaš nuoskkideapmi stuorru dramáhtalaččat.
Rusttet lea lahka Golf-rávnnji, ja dagaha ahte gohču leavvá viidát.
Muolkkáid lagašsullot leat sávzzaid ja bohccuid deaŧalaš guohtuneatnamat, ja guohtumiid ferte bisuhit nu ráinnasin go vejolaš.

Muolkkáid rusttega luoitimiid ferte doalahit dan dásis mat mearriduvvojedje konsešuvdnaeavttuin, ja dan fertejit sii geain lea ovddasvástádus, váldit duođas.

Bargiidbellodaga sámediggejoavku ávžžuha Sámediggeráđi váldit ovdan gássaluoitinášši Stáhta nuoskkidanbearráigeahčuin SFT:in.