Fuolakeahtes Sámedikki eanetlohku

Sámedikki dievasčoahkkimis bivdin mun Sámediggeráđi galggašit leat eanet oidnosis dan giččus masa ovttaskas sápmelaččat dál šaddet negatiiva oainnu geažil, mii erenoamážit dán giđa lea vuhtton sápmelaččaid ja sámivuođa vuostá.

Presideanta Aili Keskitalo duođaštii Sámedikki sárdnestuolus ahte sus lei seamma ballu go mus dáid negatiiva oainnu ektui, ja ahte dá lei bargu maid sii váldet duođalažžan. Muhto son ii ádden ahte mun ja Bargiidbellodat ii leat fuomášan ahte dá lei bargu mainna Sámediggeráđđi lea bargan dán giđa.

Sámediggi lea dál meannudan gaskaboddosaš njuolggadusaid rievdaduvvon meahccegeavaheami várás almmatge Finnmarkku álbmoga oainnu haga.
Vaikko Bargiidbellodat gáibidii ahte galggai árvaladdat álbmogiin, ja fylkkagieldda ja gielddat stuorát oasis Finnmarkkus vuosttaldedje, mearridii Sámedikki eanetlohku njuolggadusaid.

Dákkár ráđđenhálu maid Sámedikki eanetlohku čájehii Finnmárkku álbmoga ektui ii leat rivttes geaidnu jus áiggoš unnidit ovdagáttuid sápmelaččaide ja sámivuhtii. Dás boahtá maid čielgasit ovdan váilevaš beroštupmi mo lea eallit máŋggakultuvrralaš servodagas. Galggašii vuordit ahte goitge sápmelaččat dovdet mo badjelgeahččanvuohta historjjálaččat lea duvdán vulos sámi kultuvrra, giela ja ealáhusaid, ja vel otná rádjai dovdet muhtun sápmelaččat iežaset vealahuvvon.

Bargiidbellodat hukse iežas sámepolitihka eamiálbmogiid álbmotrievttálaš gáibádusaid vuđol, erenoamážit gáhtten dihtii kultuvrra. Ja mii áigut ovddidit vuoiggalat ja oadjebasat servodaga gos sámiid ja dážaid guhtet guoimmiset ja eará olmmoš čearddaid árvvusatnin lea vuođđun ja gos sámegielas, kultuvrras ja servodateallimis galgá leat sihkkaris boahtteáigi.

Bealistan ferten dadjat ahte in leat vel vuohttán ahte Sámediggeráđđi ja Sámedikki eanetlohku aktiivvalaččat barget dan ala ahte fámuhuhttet dan negatiiva oainnu sápmelaččaid vuostá mii dál lassána min servodagas.


Vibeke Larsen
sámediggeáirras Davit- Nordland