Illudahtti oaiviliskkadeapmi bargiidbellodahkii Sámedikkis

Preassadieđáhus

Illudahtti oaiviliskkadeapmi bargiidbellodahkii Sámedikkis

Mii leat dihtomielalaččat bidjan návccaid dasa ahte Sámediggi galgá leat eambbo oidnosis beaivválaš politihkas, ja ahte sámi álbmot galgá oaidnit bohtosiid dan barggus maid Sámediggi dahká, dadjá parlamentáralaš jođiheaddji Willy Ørnebakk, cealkámušas Opinion oaiviliskkadeapmái, mas Bargiidbellodat ollu ovdána.

Sámedikki politihkkárat leat álbmoga bálvvát, ja álbmotválljejuvvon áirasat galget guldalit daid sávaldagaid ja dárbbuid mat sámi servodagas ilbmet.

Opinions Sámediggeválgga bellodatlogut čájehit ahte 39,4% jerrojuvvon olbmuin livčče jienastan Bargiidbellodaga jus dál livččii leamašan válga. Dát lea 7,5% ovdáneapmi 2005 sámediggeválgga ektui.

Dát čájeha earret eará ahte Bargiidbellodagas lea viiddis doarjja iežas politihkkii Sámedikkis ja álbmogis.
-Lea hui illudahtti oaidnit ahte Bargiidbellodat maiddái lea ovdánan dan áigodagas go mii leat stivren Sámedikkis, dadjá Willy Ørnebakk. Iskkadeapmi čájeha ahte Bargiidbellodat lea ovdánan 2,9% proseanttain go buohtastahttá sullásaš iskkademiin mii lei 2006 čakčamánus.

-Min mielas lea dehálaš hukset lihtuid Sámedikkis ja politihkalaš birrasiiguin muđui nai vai sáhttá doaimmahit buori politihkalaš barggu. Lihtut leat dárbbašlaččat vai oažžu rievttes ja ulbmillaš mearrádusaid, deattuha Willy Ørnebakk. Son čujuha dasa ahte lea nanu politihkalaš dáhttu Bargiidbellodagas vuoruhit ovttasdoaimma gaskal Sámedikki ja sámi álbmoga.


Gulahallanolmmoš: Willy Ørnebakk telefovdna 77 71 54 72 mobiila 911 74 752 e-poasta willyorn@online.no