Mielkeeriid oastin- ja vuovdinortnet berre heaittihuvvot

Mielkeeriid oastin- ja vuovdinortnet berre heaittihuvvot

Mielkeeriid oastin- ja vuovdinortnet váldojuvvui atnui dan áiggis go riikkas lei mielkki badjelmearebuvttadeapmi. Ulbmil lei oastit buvttadeddjiid eret ealáhusas. Máŋga jagi maŋŋel go leat mielkeeriid čuohpadan vuostáheavvalprinsihpain, eiseválddit válde atnui dán ortnega vai eai šat nu ollugat livčče mielde juogadeame buvttadeami ja dainnalágiin addit vejolašvuođa lassánan buvttadeapmái ja lassánan gánnáhahttivuhtii juohke eanandálus.
Odne lea áibbas eará dilli. Lea unnán mielki márkaniin, seammás go hui ollugat dán ealáhusas háliidit heaitit. Unnán bargguhisvuohta dahká álkibun gávdnat eará barggu. Mielkeeriid oastin- ja vuovdinortnet doalvu dasa, ahte eanandállu gos earri vuvdojuvvo, ii goassege šat sáhte buvttadit mielkki dannego dálus ferte leat earri vai sáhttá oastit eanet mielkeeriid. Ná šaddet unnán eanandálut. Rekruteren dahkko váttisin. Ortnet váikkuha maid dasa, ahte sii geat háliidit joatkit ealáhusain, dagahit alcceseaset stuora liigevealgegoluid mielkeeriid oasttidettiin. Sii, geat dinejit dáinna ortnegiin, leat sii geat juo leat áigon heaitit ealáhusain, ja báŋkkut mat ruhtadit oastimiid.

Sámediggi ferte bargat dan ala vai oažžut ruovttoluotta boares gollofriija mielkeeriid juohkinortnega, mii lei eanadolliid gaskkas, dađistaga go doaluid lohku rievdá. Mielkeeriid oastin- ja vuovdinortnet ferte heaittihuvvot.
Ferte ásahit ortnega, mii sihkkarastá, ahte sii geat leat geavahan ollu ruđa eriid oastimii dan áigodagas, eai gillá das vahága.