Helmer duođaid ánssáša fásta doarjaga Sámedikkis

Preassadieđáhus - Helmer duođaid ánssáša fásta doarjaga Sámedikkis Várjjat mearrasámi vuorká oažžu boahtte jagi rájes 50 000 fásta jahkásaš doarjaga Sámedikkis. – Helmer Losoa duođaid ánssáša doarjaga. Son lea moanat jagiid bargan eaktodáhtolaččat ráhkadit vuorkká mii lea mearrasámiide gutniin boahtte áigái, lohka Knut Store (A) Varjjagis.

Knut Store lea guhkká áŋgiruššan Buoiluovtta sámi vuorkái Unjárgga gielddas bistevaš doaibma doarjaga. Helmer Losoa lea viššalit bargat iežas astoáiggis čohkkendihti buot lágan dávviriid, bivdobiergasiid ja eará ávdnasiid mat leat leamaš dábálačča Várjjatvuona sámiid árgabeaivvis. Ollugat leat rámidan Helmer Losoa dán barggu ovddas ja lea maiddái gudnejahttojuvvon dán ovddas, muhto goluide leamaš lean unnán veahkki. - Sámediggi han maid lea doarjon Helmer Losoa barggu ekonomalaččat go lea vuorkkáin dokumenteren historjjá ja eallinvuogi maid eai nu ollugat dovdda. Muhto go Sámediggi dál juolluda bistevaš jahkásaš doarjaga, de doaivvun dán movttidahttit Helmera bargat viidásabbot dáinne deaŧalaš bargguin, lohká Knut Store. Son lohká áinnas bargat ovddasguvlui vai mearrasámi vuorkái addo eambbo almmolaš ruhtadoarjja ja áigu háleštit dán birra Helmer Losoain. Gulahallanolmmoš: Knut Store mobiltelefuvdna: 957 20 629 epoasta knut.store@nesseby.kommune.no