Sámediggi geavaha ođđa vugiid háhkat eanet oahpponeavvuid

Preassadieđáhus


Sámediggi geavaha ođđa vugiid háhkat eanet oahpponeavvuid

Sámediggi geavaha ođđa vugiid vuoruhit ahte mánát ja nuorat ožžot daid veahkkeneavvuid maid sii dárbbašit skuvlaárgabeaivvis. Hui gelddolaš árvalus, dadjá Inger Jørstad Bargiidbellodagas.

Sámedikki 2009 bušeahtas lea ođđa lassáneapmi ruhtajuolludeamis ja árvalus ođđa vugiide mot sáhttá lasihit oahpponeavvobuvttadeami. 2008 ođastuvvon bušeahtas biddjojuvvui sisa 2,5 miljovnna eanet oahpponeavvobuvttadeapmái. 2009 bušeahtas lasihuvvo ruhtajuolludeapmi vel 1 milj. ruvnnuin.

Dál lea várrejuvvon 4 milj. ruvdno dasa ahte jorgalit matematihkka girjjiid sámegillii, mii goit lea ožžon hui olu fuomášumi maŋemus áiggiid. Dasa lassin geahččaluvvo dál áibbas ođđa ortnet, mii gohčoduvvo resursaskuvlan. Lea várrejuvvon 2 milj. ruvdno prošektii mas Ájluovtta skuvla Divttasvuonas šaddá vuosttaš skuvlan gos galgá atnit ávkki oahpaheddjiid gelbbolašvuođas dasa ahte vuoruhit ahte návccat biddjojuvvojit hoahpuhit oahpponeavvuid buvttadeami.

Lassin ruđaide mat leat njuolgut várrejuvvon oahpponeavvobuvttadeapmái, de leat maiddái eará bušeahttapoasttat, vuoruhuvvon ruđat máŋga konkrehta prošektii maiguin čuovvola Sámedikki strategalaš plána oahpponeavvuid ráhkadeapmái.

Sámediggi lea rievttes bálgá alde go dál vuoruha njulget daid bonjuvuođaid mat leat leamašan sámi oahpponeavvobuvttadeamis, ja dát lea suorgi mii lea ávkin giellavuoruheapmái, dadjá sámediggeáirras Inger Jørstad


Gulahallanolmmoš: Inger Jørstad mobiila: 477 50 892 epoasta: incejo@start.no