Sámediggi mii lea ávkin sámi álbmogii

Sámediggi mii lea ávkin sámi álbmogii

Bargiidbellodat, Árja, Nordkalottfolket, Samer bosatt i Sør ja Åarjel-Saemiej Gïelh lea huksen ovttasbargujoavkku Sámediggái bohti njeallje jahkái. Joavku lea huksen oktasaš politihkalaš vuođu ja áigu ásahit oktasaš Sámediggeráđi. Ulbmilin lea dagahit Sámedikki buoret gaskaoapmin sámi álbmogii ja sihkkarastit Sámediggái buori stivrrejumi boahtte njealji jahkái.
Presideanta Egil Olli (59), BB, jođiha ráđi ja Laila Susanne Vars (33), Árja, šaddá várrepresideantan. Muđui leat ráđis mielde Marianne Balto (53), BB, Vibeke Larsen (38), BB ja Ellinor Marita Jåma (30), Åarjel-Saemiej Gïelh. Ovttasbargu bealit leat maid mearridan árvalit Toril Bakken Kåven (41), Nordkalottfolket, lahttun Finnmárkkuopmodaga stivrii ja Marie Therese Nordsletta Aslaksen (30) doarjjastivrra jođiheaddjin.
Šiehtadallamat politihkalaš vuođđun leamaš lean hástaleaddji, muhto boađus lea šaddan buori gaskaoapmin dagahit Sámediggi eambbo rahpasin ja álbmogii ávkin. Ealáhuspolitihkka, giella ja kultuvra, oahpahus ja dearvvašvuođa politihkka, ođđa politihkka boarrásiidda ja nannet sámi árbevirolaš resurssa ja meahccegeavaheami.
Vuođđun min politihkkii lea min sierranas kultuvra, min oktasaš árvuvuođđu ja min gullevašvuohta sámi guovlluide. Dáid guovlluid kultuvra čájeha čielgasit ahte sápmelaččat lea ássan dáppe don dolin earret eará meahccegeavaheami vieruin.
Min árvuvuođđu lea vuoiggalašvuohta ja ovttadássásašvuohta. Joavkku áigu jođihit politihkka mii dahká olbmuid ovttadássásažžan, leahcat dal sámit, dážat, kveanat dahje eará álbmogat. Mii áigut bargat eanet dan ala ahte olbmot soabadit buorebut ja barget ovttas sámi servvodagain. Mii háliidat ásahit Verdde-prošeavtta máinne čalmmustahttit boares olbmuid árvvu ja máhtolašvuođa. Boares olbmuid máhtolašvuohta galgá geavahuvvot buoret oktavuođaid hukset rittu- ja siseatnanguovlluid gaskka, ja boazusámiid ja eará sámiid gaskka.
Olbmuid árgabeaivvi eallin sin ruovttuguovlluin ja sin oasástallan buot servvodaga beliin, olles eallimis, riegádeamis jápmimii, galgá ofelastit min politihka. Min áigumuš lea luohtehahtti ja gievrras Sámediggi.
Mii háliidat buoridit oktavuođaid Sámedikki ja álbmoga gaskka, vai sii dovdet ahte Sámediggi lea sin várás. Buot sámi guovlluin, gávpogiin ja gilážin, galgá Sámediggi bálvalit olbmuid. Deaivvadanbáikkiid ja gulahallan gaskaomiiguin háliidat mii hukset buoret oktavuođaid servvodagas.
Sámi kultuvra galgá ovdánit sámiid iežaset eavttuid ala. Mii mearkkašit ja oaidnit daid erenoamáš hástalusaid mat leat mearrasámiid ja máttasámiid guovlluin.