Vuoruhehpet boazodoalu nuoraid

Vuoruhehpet boazodoalu nuoraid Bargiidbellodat lea iežas sámediggeválgaprográmmas mearridan nannet ja vuoruhit boazodoalu rekrutterenortnega. Nuorain ferte leat vejolašvuohta oažžut sierra siidaoasi. Muhtin nuorat leat vuordinlisttus dasa ahte oažžut boazodoallokonsešuvnna. Ollugat dáin nuorain barget dál váhnemiid dahje eará fulkkiid siidaosiin. Álgoálggus lea dat vuogas ortnet sidjiide geat leat álggahanmuttus. Dainna lágiin háhket sii boazodoalus praktihkalaš fágamáhtu, mii lea lassin vejolaš teorehtalaš gelbbolašvuhtii. Dál lea ealáhus giddejuvvon ealáhus, nuoraide lea measta leamašan veadjemeahttun oažžut siidaoasi. Soames háve leat nuorat ožžon vejolašvuođa beassat ealáhussii buolvamolsumis go váhnemat dahje eará lagas fuolkkit leat heaitán boazodoaluin. Ođđa boazodoalloláhka (2007) rahpá vejolašvuođa ásahit bálddalas rekrutterenoasi, nu ahte nuorain geat áigot ealáhussii leat einnostahtti boahtteáigi. Dál eai gávdno báljo makkárge ekonomalaš ortnegat dakkár rekrutterenoasi váste. Bargiidbellodat oaivvilda ahte dán ortnegii fertejit laktašuvvot ekonomalaš vuoigatvuođat. Vuoras dievddut leat eanetlogus dain geain dál leat siidaoasit. Danin Bargiidbellodat berošta das ahte ealáhusas galgá leat buolvamolsun, nuorra olbmot fertejit eambbo beassat fárrui. Ferte bargojuvvot aktiivvalaččat nu ahte eanet nieiddat sáhttet bargat boazodoalus. Dát lea maiddái dehálaš dasa ahte bisuhit aktiiva ealáhusdoaimma, nu ahte siiddain leat doarvái bargofámut. Go nuorat olbmuide galgá leat sadji, de lea dehálaš ahte boarráset buolva čáhkkeha saji nuoraide. Diehttelasat gáibiduvvo ahte olgguldas dilálašvuođat leat čielggaduvvon boazodoalu kollektiivvalaš vuoigatvuođaid sihkkarastima dáfus. Nuorat buolva vuordá eambbo einnostahttivuođa sihke ekonomalaš dilálašvuođain ja vuoigatvuođagažaldagain. Ii leat sáhka das ahte addit oktiige ođđa vuoigatvuođaid, muhto sihkkarastit ahte álgoálbmogiid dilálašvuođat nannejuvvojit. Bargiidbellodat háliida ahte nuorat movttiidahttojuvvojit joatkit dáinna árbevirolaš ealáhusain. Mii váldit boazodoalu hástalusaid duođas, ja bellodat áigu ain garrasit vuoruhit ahte ealáhusa boahtteáigi sihkkarastojuvvo. Bargiidbellodaga sámediggeevttohas Nuorta válgabiirres Mariann Wollmann Magga