Sámedigge presideanta dearvuođat sárdni Alf K. Tellefsenii

Ráhkis olbmot! Ráhkis Alf!

Sámedikki bealis sávan váimmolaččat lihku dán jagáš biibbalbálkkašumiin. Mu mielas lea Norgga Biibbalselskáhppi dahkan hui buori mearrádusa go leat mearridan dutnje addit bálkkašumi dán jagi.

Biibbalselskáhppi háliida bálkkašumiin addit rámi olbmuide geat iešguđet ge ládje leat gaskkustan Biibbala sága. Ja juste dan lea Alf Tellefsen dahkan measta olles su eallinagi. Dat lea juoga man mun ieš lean vásihan. Muittán mánnán Porsáŋggus go Alf máŋgga geardde finai min viesus ja doalai lohkkamiid ja sárdnidii Ipmila sáni. Dieđán ahte ii dušše min luhtte fitnan, muhto sus lei erenomáš beroštupmi dasa ahte sápmelaččat galge beassat gullat Ipmila sáni, ja iežaset gillii maiddái. Danin mátkkoštii son sihke mearrasámi guovlluin ja siseatnamis ja doalai lohkamiid. Son lei nuorran juo oahppan sámegiela, ja de sus lei dat reaidu mii lei dárbbašlaš jus galggai joksat olbmuid iežas ságain. Dála áiggis lea son nu go diehtibehtet heaittikeahttá joatkán doaimmain gaskkustit Biibbala sága, ja lea radio DSF bokte ráhkadan ráiddu “Geaidnu Biibbala čađa”.

Alf, sámi álbmoga ovddas, sávan okte vel lihku bálkkašumiin, ja háliidan giitit dan hirbmat stuora barggu ovddas man leat doaimmahan Sámis go Biibbala sága leat gaskkustan.

Giittán beroštumi ovddas!