Sámi kulturmáhttu ja dulkabálvalusa gáibádus

Sámi kulturmáhttu ja dulkabálvalusa gáibádus

Sámediggi registrere ahte váilot ollu dulkabálvalusat ja váilu sámi kulturmáhttu buot dásiin almmolaš suorggi siskkobealde. Dát lea váttisvuohta buot ásahusain, gos sámi geavaheaddjit leat oassálastit.
Eiseváldit fertejit juolludemiid oktavuođas iešguđet ásahusaide, gáibidit sámi kulturmáhtu ja gáibidit ahte addojit dulkabálvalusat.

Mii sáhttit ain vásihit váilevaš árvvusatnima almmolaš ásahusaid beales, sámi geavaheddjiid vuoigatvuhtii gulahallat ieažaset gillii. Váilevaš sámi kulturmáhttu maiddái dagaha ahte sámi geavaheaddjit eai oaččo dan meannudeami ja čuovvoleami go galggaše sáhttit gáibidit, gielalaš ja kultuvrralaš cakkiid geažil.

Sámediggeráđđi ávžžuhuvvo guorahallat dán váttisvuođa guovddáš eaiseváldiiguin, ja ovddidit gáibádusa ráđđehussii, ahte departemeantta ja direktoráhta stivrendokumeanttain boahtteáiggis galgá leat gáibádus ásahusjođiheddjiide buot servodatossodagain, ahte bargiin lea sámi kulturmáhttu ja ahte fállojit dulkabálvalusat. Dát ferte daddjojuvvot dainna lágiin ahte lea bearráigeahččama, dárkkisteami ja čuovvoleami vuollásaš.