Čállán Sámedikki ráđđelahttu Jørn Are Gaski
Sámi populisma
Sávvat ahte Sámedikki ovttajienalaš mearrádus áššis “ Strategalaš plána 2009-2012 oahpponeavvobuvttadeapmái” dál čatná buot bellodagaid nu garrasit ahte garvit ođđa politihkalaš mohkohallamiid boahttevaš jagiin.
2008-07-10 Webmaster-I
Sámi populisma
Čállán Sámedikki ráđđelahttu Jørn Are Gaski (AP)
Muhtin áššiin lea Sámediggeráđđi cuiggoduvvon go aittobáliid hilggui guokte ohcama mat gullet julevsámi oahppogirjebuvttadeapmái ja bohte Divttasvuona suohkanis ja Árran julevsámi guovddážis. Goappeš ohcama leat huksejuvvon stuora ja divrras prošeaktan máŋgga jagi badjel, mas earenoamážit deattuhuvvo virgáidit olbmuid ja mas ii muitaluvvo makkár girjjiiguin dahje fágaiguin lea jurddašuvvon bargojuvvot.
Sámediggeráđđi meannuda ekonomalaš ohcamiid guovtti iešguđet orgánas, Doarjjastivrras ja Sámediggeráđis.
Doarjjastivrii čohkkájit sámediggepolitihkkárat seamma gorrelogu mielde go mot dievasčoahkkin politihkalaččat lea oktiibiddjojuvvon. Stivra lea hálddašanorgána mii meannuda ohcamiid eanas ohcanvuđot doarjjaortnegiidda mat Sámedikkis leat, - bienalaš vuoruhemiid mielde maid Sámedikki dievasčoahkkin lea dahkan jahkásaš bušeahttamearrádusas. Doarjjaohcamat oahpponeavvobuvttadeapmái meannuduvvojit “Strategalaš plána” vuođul mas lea bienalaččat muddejuvvon makkár fágaid, ahkecehkiid jnv galgá vuoruhit jagis jahkái. Sámedikkis ii lean danin vejolašvuohta diktit Doarjjastivrra meannudit dáid ohcamiid, danin go ohcamat eai lean almmustahttán maidege mii heivii daid gáibádusaide maid Sámedikki dievasčoahkkin lea bidjan 2008 oahpponeavvobuvttadeapmái.
Sámediggeráđis, mas dál čohkkájit Bargiidbellodaga áirasat, leat guokte iešguđet doaimma ekonomalaš ohcamiid ektui. Ráđđi lea váiddaorgána doarjjastivrra mearrádusaide mat váidojuvvojit ja dasto dat seaguhuvvo áššiide maid dát stivra meannuda ovdal go jus šaddá váiddameannudeapmi. Dasa lassin lea Sámediggeráđis hálddašanovddasvástádus ruđaide maid Sámediggi lea várren dásseárvui, dearvvašvuođaprošeavttaide, organisašuvdnadoarjagiidda, regionálalaš ovttasbargui fylkkagielddaiguin, ja giellaprográmmaid metodaovdánahttimii ja árbevirolaš máhtu čohkkemii masa oassi Sámeálbmot foandda ruđain geavahuvvo. Sámediggi ii leat várren ruđaid maiguin Sámediggeráđis lea vejolašvuohta 2008:s juolludit ruđaid Divttasvuona suohkana ja Árrana ohcamiidda.
Árranis lea dál dat buoremus sámi gelbbolašvuođabiras olles riikkas dan ektui ahte ráhkadit prošeaktaohcamiid, ja go sis lea buorre máhttu Sámedikki barggu birra, de lea váttis ipmirdit manin sii leat sádden ohcama mii ii heive Sámedikki doarjjaortnegiidda.
Divttasvuotna bođii fárrui sámegiela hálddašanguvlui 1.1.2007:s, ja lea ožžon veaháš cuiggodemiid go sin bargu sámegielain váldá áiggi. Sámediggeráđđi lea hui positiiva dasa ahte Divttasvuona suohkan čájeha beroštumi. Vaikko ii sáhttán juolludit ohcama mii sáddejuvvui, de mun lean ovdal geažidan ahte mun maŋŋel luomu válddán álgaga ságastallat suohkaniin viidáset ovttasbarggu birra. Sámediggi lea “Strategalaš plána” ođasteami oktavuođas mearridan ahte áigodagas 2009-2012 áigu geahččalit ovdánahttit resursaskuvllaid vai oahppogirjebuvttadeamis oažžu leahtu, ja Ájluovtta skuvla Divttasvuonas lea dakkár skuvla gosa sáhttá leat lunddolaš geahččalit bidjat dákkár nákcabidjama.
Áibbas ipmirmeahttun dán divaštallamis, dadjat juo populisttalaš, šaddá NRS -joavkku jođiheaddji Aili Keskitalo oaivil mas son cuiggoda Sámediggeráđi go ii leat juolludan ruđaid dáid ohcamiidda. Sámediggeráđđi namalassii ovdanbijai bušeahttaárvalusa 07 skábmamánus, mas árvaleimmet várret 3 miljovnna ruvnno dutkamii, duođašteapmái ja guorahallanbargui. 2008:s galge vuoruhuvvot fágasuorggit giella, oahpaheapmi, dearvvašvuohta- ja sosiálasuorgi, árbevirolaš máhttu ja álgoálbmotvuoigatvuođat. Dáiguin ruđaiguin livččii soaitán vejolašvuohta váldit vuhtii dáid ohcamiid, muhto min árvalus dađi bahábut cuiggoduvvui garrasit dievasčoahkkinsáles.
«Sámediggeráđi veahkkeruđat mat eai leat moktege Sámediggái ávkin” lei NSR:s muhtin cealkámuš bušeahttadivaštallamis. Nugo muhtumat soitet muitit, de válljii NSR ovttasbargat iežas ovddeš ovttasbargoguimmiiguin. Bušeahttamearrádusas danin dát 3 miljovnna ruvnno ee. geavahuvvui addit eanet doarjaga sámi organisašuvnnaide, juoga mii mielddisbuvttii ahte NSR iežas organisašuvdnadoarjja lassánii 2007:s 2008:ái lagabui 400 000 ruvnnuin.
Oažžut beare sávvat ahte Sámedikki ovttajienalaš mearrádus áššis “ Strategalaš plána 2009-2012 oahpponeavvobuvttadeapmái” dál čatná buot bellodagaid nu garrasit ahte garvit ođđa politihkalaš mohkohallamiid boahttevaš jagiin.
Čállán Sámedikki ráđđelahttu Jørn Are Gaski (AP)
Muhtin áššiin lea Sámediggeráđđi cuiggoduvvon go aittobáliid hilggui guokte ohcama mat gullet julevsámi oahppogirjebuvttadeapmái ja bohte Divttasvuona suohkanis ja Árran julevsámi guovddážis. Goappeš ohcama leat huksejuvvon stuora ja divrras prošeaktan máŋgga jagi badjel, mas earenoamážit deattuhuvvo virgáidit olbmuid ja mas ii muitaluvvo makkár girjjiiguin dahje fágaiguin lea jurddašuvvon bargojuvvot.
Sámediggeráđđi meannuda ekonomalaš ohcamiid guovtti iešguđet orgánas, Doarjjastivrras ja Sámediggeráđis.
Doarjjastivrii čohkkájit sámediggepolitihkkárat seamma gorrelogu mielde go mot dievasčoahkkin politihkalaččat lea oktiibiddjojuvvon. Stivra lea hálddašanorgána mii meannuda ohcamiid eanas ohcanvuđot doarjjaortnegiidda mat Sámedikkis leat, - bienalaš vuoruhemiid mielde maid Sámedikki dievasčoahkkin lea dahkan jahkásaš bušeahttamearrádusas. Doarjjaohcamat oahpponeavvobuvttadeapmái meannuduvvojit “Strategalaš plána” vuođul mas lea bienalaččat muddejuvvon makkár fágaid, ahkecehkiid jnv galgá vuoruhit jagis jahkái. Sámedikkis ii lean danin vejolašvuohta diktit Doarjjastivrra meannudit dáid ohcamiid, danin go ohcamat eai lean almmustahttán maidege mii heivii daid gáibádusaide maid Sámedikki dievasčoahkkin lea bidjan 2008 oahpponeavvobuvttadeapmái.
Sámediggeráđis, mas dál čohkkájit Bargiidbellodaga áirasat, leat guokte iešguđet doaimma ekonomalaš ohcamiid ektui. Ráđđi lea váiddaorgána doarjjastivrra mearrádusaide mat váidojuvvojit ja dasto dat seaguhuvvo áššiide maid dát stivra meannuda ovdal go jus šaddá váiddameannudeapmi. Dasa lassin lea Sámediggeráđis hálddašanovddasvástádus ruđaide maid Sámediggi lea várren dásseárvui, dearvvašvuođaprošeavttaide, organisašuvdnadoarjagiidda, regionálalaš ovttasbargui fylkkagielddaiguin, ja giellaprográmmaid metodaovdánahttimii ja árbevirolaš máhtu čohkkemii masa oassi Sámeálbmot foandda ruđain geavahuvvo. Sámediggi ii leat várren ruđaid maiguin Sámediggeráđis lea vejolašvuohta 2008:s juolludit ruđaid Divttasvuona suohkana ja Árrana ohcamiidda.
Árranis lea dál dat buoremus sámi gelbbolašvuođabiras olles riikkas dan ektui ahte ráhkadit prošeaktaohcamiid, ja go sis lea buorre máhttu Sámedikki barggu birra, de lea váttis ipmirdit manin sii leat sádden ohcama mii ii heive Sámedikki doarjjaortnegiidda.
Divttasvuotna bođii fárrui sámegiela hálddašanguvlui 1.1.2007:s, ja lea ožžon veaháš cuiggodemiid go sin bargu sámegielain váldá áiggi. Sámediggeráđđi lea hui positiiva dasa ahte Divttasvuona suohkan čájeha beroštumi. Vaikko ii sáhttán juolludit ohcama mii sáddejuvvui, de mun lean ovdal geažidan ahte mun maŋŋel luomu válddán álgaga ságastallat suohkaniin viidáset ovttasbarggu birra. Sámediggi lea “Strategalaš plána” ođasteami oktavuođas mearridan ahte áigodagas 2009-2012 áigu geahččalit ovdánahttit resursaskuvllaid vai oahppogirjebuvttadeamis oažžu leahtu, ja Ájluovtta skuvla Divttasvuonas lea dakkár skuvla gosa sáhttá leat lunddolaš geahččalit bidjat dákkár nákcabidjama.
Áibbas ipmirmeahttun dán divaštallamis, dadjat juo populisttalaš, šaddá NRS -joavkku jođiheaddji Aili Keskitalo oaivil mas son cuiggoda Sámediggeráđi go ii leat juolludan ruđaid dáid ohcamiidda. Sámediggeráđđi namalassii ovdanbijai bušeahttaárvalusa 07 skábmamánus, mas árvaleimmet várret 3 miljovnna ruvnno dutkamii, duođašteapmái ja guorahallanbargui. 2008:s galge vuoruhuvvot fágasuorggit giella, oahpaheapmi, dearvvašvuohta- ja sosiálasuorgi, árbevirolaš máhttu ja álgoálbmotvuoigatvuođat. Dáiguin ruđaiguin livččii soaitán vejolašvuohta váldit vuhtii dáid ohcamiid, muhto min árvalus dađi bahábut cuiggoduvvui garrasit dievasčoahkkinsáles.
«Sámediggeráđi veahkkeruđat mat eai leat moktege Sámediggái ávkin” lei NSR:s muhtin cealkámuš bušeahttadivaštallamis. Nugo muhtumat soitet muitit, de válljii NSR ovttasbargat iežas ovddeš ovttasbargoguimmiiguin. Bušeahttamearrádusas danin dát 3 miljovnna ruvnno ee. geavahuvvui addit eanet doarjaga sámi organisašuvnnaide, juoga mii mielddisbuvttii ahte NSR iežas organisašuvdnadoarjja lassánii 2007:s 2008:ái lagabui 400 000 ruvnnuin.
Oažžut beare sávvat ahte Sámedikki ovttajienalaš mearrádus áššis “ Strategalaš plána 2009-2012 oahpponeavvobuvttadeapmái” dál čatná buot bellodagaid nu garrasit ahte garvit ođđa politihkalaš mohkohallamiid boahttevaš jagiin.
Skriv ut
Tips en venn