Sámi valáštallangállá 2008 – sárdni

Sámi valáštallangállá 2008 – sárdni

Sámi valáštallangállá 2008 – sárdni

Ráhkis valáštallanustibat! Buorit olbmot!
Munnje lea stuora illu go beasan oassálastit dán jagáš valáštallangállás. Sámedikki bealis giittán go lehpet mu bovden doallat rahpansártni.
Sámi valáštallanlihkádus lea deaŧalaš kulturgaskkusteaddji nuoraidbirrasiin beroškeahttá riikkarájiid. Mus, ja Sámediggeráđis, lea beroštupmi dasa ahte organiserejuvvon valáštallan galgá oažžut vejolašvuođa joatkit deaŧalas barggus. Mu mielas dát valáštallangállá, gos leat čoahkkanan sihke nuorra ja vuorraset valáštallit ja valáštallanustibat miehtá Sámis, lea buorre govva ja vuogas duođaštus dan buori bargui mii dahkko sámi valáštallamis.
Odne galget bálkkašumit juhkkojuvvot iešguđetge suorggis. Mun hálidan sávvat lihku sidjiide geat leat nominerejuvvon bálkkašumiide, ja mun hálidan dál juo sávvat lihku sidjiide geat ožžot bálkkašumi. Dat galgá leat stuora ánsu beassat sin searvái geat nominerejuvvojit ja geat loahpalaččat ožžot sámi valáštallanbálkkašumi. Bálkkašupmi lea bálkán dan ovddas maid valáštalli juo lea oláhan. Seammás galgá bálkkašupmi movttiidahttit valáštalli ja maiddái muđui nuoraid Sámis áŋgiruššat valáštallamiin, sihke vuolit- ja bajit dásis. Go mii dál leat dáppe Romssas, de sáhttit niegadit ahte dáppe, logi jagi geahčen, cahkkehuvvo olymiijadolla, ja muhtun dis geat dál lehpet dás lehpet nu ovdánan valáštallamiin ahte lehpet ráhkkaneame oassálastit olympiijagilvvuide mat lágiduvvojit din ruovttuguovllus.
Juoga mii ii leat dušše niehku lea ahte máŋggas dis geat dál lehpet dás, mánu geahčen lehpet Yellowknife gávpogis Canadas ovddasteame Team Sápmi Árktalaš dálveriemuin (AWG). Mun, gii lean Norgga Sámedikki presideanta, ja Sámi Párlamentáralaš Ráđi (SPR) presideanta, oainnán ahte dát doalut leat hirbmat deaŧalaččat ja mávssolaččat sámi servodahkii. AWG-doaluid oktavuođas besset nuorra sámi valáštallit ja kulturbargit ovddidit ovttasbarggu gaskaneaset riikkarájiid rasta, ja seammás ožžot vejolašvuođa oahpásnuvvat ja dovdat oktasašvuođa eará eamiálbmotnuoraiguin ja nuoraiguin eará árktalaš guovlluin. Dasa lassin lea nuoraide hástalus oassálastit AWG gilvvuin ja kulturdoaluin. Bealistan lea mus plána čuovvut dán jagáš AWG, ja jus galggan leat áibbas vuoiggalaš: Dát lea juoga masa mun duođai illudan. Dát lea várra okta dain buoremus doaimmain mat čuvvot mu SPR presideantámmáha.
Norgga Sámedikkis hálidit movttiidahttit nuorra valáštallit áŋgiruššat valáštallamiin. Danin leat mii álggahan nuoraid valáštallanbálkkašumi-ortnega. Sámedikki dievasčoahkkimis miessemánus dán jagi áigut juohkit guokte bálkkašumi nuorra sámi valáštalliide, goabbáige 25 000 ruvnno. Mii jugiimet bálkkašumi vuosttaš geardde diibmá, ja de oaččuiga taekwondovaláštalli Siv Anja Mienna ja bođuvaláštalli Oda Utsi Onstad goabbat bálkkašumi. Dás geavahan liibba din bivdit midjiide sáddet ovttaskas valáštalli dahje searvvi nama gean oaivvildehpet ánssašivčče bálkkašumi dán jagi. Evttohusaid bivdit ovdal njukčamánu maŋŋemus beaivvi. Ovttaskas valáštallit geat ožžot bálkkašumi galget leat gaskal 16 ja 25 jagi. Jus bálkkašupmi geigejuvvo muhtun searvái, de sáhttá bálkkašupmi geigejuvvot nuorat valáštalliide ge. Dán birra boahtá fargga diehtu áviissain ja min ruovttusiiddus.
Loahpas hálidan sávvat lihku dán eahkeda doaluiguin, ja sávan ahte buohkaide šaddá hávskkes eahket.
Giittán beroštumi ovddas!