Sámiid nammadeapmi stáhtastipendiáhttaortnegii

Sámiid nammadeapmi stáhtastipendiáhttaortnegii

Stuoradiggi mearrida jahkásaččat stáhtastipeandaortnega mearreruđa. Kultur- ja girkodepartemeanta hálddaša ortnega ovttasráđiid Máhttodepartemeanttain. Ulbmiljoavkun leat olbmot fágaidrasttildeaddji dahje eahpedábálaš bargosuorggis mas lea servodatlaš mearkkašupmi, ja earenoamážit dat olbmot, geain leat bargoviidodaga dahje váilevaš formála gelbbolašvuođa dihte ráddjejuvvon vejolašvuođat oažžut barggu dieđalaš institušuvnnain dahje kulturinstitušuvnnain.

Sámi kandidáhtat šaddet stuora oasis dán ortnega olggobeallái iešguđet sivaid geažil. Dárbu dákkár ortnegii lea goittotge čalmmus. Ortnega ferte heivehit sámi servodahkii ja dasa ferte addit liigedimenšuvnna Stuoradikki stáhtastipendiáhttaortnega ektui man mii dovdat. Doppe ortnet lea čadnon ovttaskas olbmo doibmii ja lea persovnnalaš ortnet. Dakkár seammalágan sámi stipeandaortnegis ferte servodatoidnui addit stuora mearkkašumi. Stipeanda ferte aŋkke leat jahkásaš submi, man vuostáiváldi sáhttá friddja geavahit iežas doaimmas. Geavatlaččat dát šaddá sisaboahtun aktuealla stipendiáhtaide.

Stipendiáhtas lea geatnegasvuohta sáddet jahkedieđáhusa, mas son muitala movt lea geavahan stipeandda. Stipendiáhtat válljejuvvojit nammadeami bokte, man ovttaskas olbmuid joavku lea vuolláičállán. Stáhtastipeandaortnegis leat dávjá kulturolbmot, geat nammadit stipendiáhtaid. Seammasullasaš sámi ortnegis ferte nammadanortnet heivehuvvot sámi servodahkii.

Evttohus sámi nammadanortnegii

Ortnet ásahuvvo stáhtastipendiáhttaortnega málle mielde. Lea goittotge hui dehálaš, ahte sámi ortnegis deattuhuvvojit sámi servodaga dárbbut. Dakkár dimenšuvdna sisttisdoallá sin, geat eahpeegoisttalaš árjjain leat váikkuhan sámi servodaga nannemii. Viidásit lea dárbu dasa, ahte sámi nammadanortnet sisttisdoallá sámi árbevirolaš máhtu ja sámi ođđaáigásašvuođa vára váldima ja daid dokumenterema. Dát lea dehálaš dainna duogážiin ahte árbevieruid sirdin ja ođđahábmen dávjá dáhpáhuvvet eahpeformála dilálašvuođain sámiid gaskkas.

Lea maid dehálaš, ahte sohkabeliid gaskasaš guovddáš dásseárvoprinsihpat čalmmustuvvojit dán ortnegis.

Lea lunddolaš, ahte Sámediggi nammada kandidáhtaid dohkálaš olbmuid dahje organisašuvnnaid evttohusaid vuođul, ja ahte ortnega hálddašit seamma departemeanttat, mat hálddašit stáhtastipendiáhttaortnega. Ortnega sáhttá váldit álggos atnui nu, ahte álggos nammaduvvojit guokte stipendiáhtta, ja de dađistaga lasihit stipendiáhtaid logu.